தீக்கற்றை

தீக்கற்றை
தீ தன்னைத் தானே பரவச் செய்யும்
அதில் மிதமும், மிகையும் காலத்தைப் பொறுத்தமையும் – தீ

பொழுது – 06

ஒரு மனத்தை
அமைதியுறச் செய்தல்
இலகுவானதுதான்
அதோ
அந்த மெல்லிய எரியும் தீயில்
எந்த முணுமுணுப்புமில்லை

பொழுது – 07

இங்கு எல்லாம் விழித்துக் கொள்கின்றன
எல்லாவற்றிலும் விழித்திருத்தல் மிக நல்லது
துளி தீ போதும்
பெருந்தீ பற்றிக் கொள்வதற்கு.

பொழுது – 08

என் நிழல்
என்னைத்தான் பின் தொடர வேண்டும்
எரியும் தீயில்
சரி, தவறென எதுவுமில்லை.

பொழுது – 09

இங்குத் தனியாய்ச் செய்ய எதுவுமில்லை
தேவைகள் முடிந்த பின்
நாம் நகர்த்தப்படுவோம்
அல்லது
நகர்ந்து கொள்வோம்
பற்றியெரியும் குப்பைத் தீயில்
பயன்படுத்தப்பட்ட தேவைகள் ஒளிர்கின்றன.

பொழுது – 10

எத்தனை எத்தனை முகங்கள்
ஒவ்வொன்றுக்கும்
ஒரு பெயர் சூட்டியும், சூட்டப்படாமலும்
முகத்தை நசுக்குகிறீர்கள்
சொல்லுங்கள்….
தீயிற்கு எதாவது முகமுண்டா?

பொழுது – 11

என் விருப்பம் எனக்கானது
சிரித்தலும், அழுதலும் இயல்பானது
பெருங்கட்டிடம் தீக்கொண்டு எரியும் போது
நானெங்கே நிற்க வேண்டுமென
நான் மட்டுமே சிந்திக்க வேண்டும்.

Thanks : saatchiart

ம. கண்ணம்மாள்

மருதநிலம் தஞ்சையைச் சொந்தமாகக் கொண்டவர். 25 ஆண்டுகள் கல்லூரியில் பேராசிரியராகப் பணி மேற்கொண்டு வருகின்றார். அதோடு, பொதுவெளியில் கவிதை, கட்டுரை, சிறுகதை என இயங்குதலோடு, சீர் வாசகர் வட்டத்தின் ஒருங்கிணைப்பாளராக உள்ளார். திருக்குறள் அக மெய்ப்பாடுகள், இலக்கண உரைகளில் சமுதாயம், முப்பெரும் கவிஞர் பாக்களில் மெய்ப்பாடுகள், பாவலரேறு ச.பாலசுந்தரம் போன்ற நூல்களையும், ‘தொல்காப்பிய மெய்ப்பாட்டியல் திருக்குறள் விளக்கம்’ என்ற நூலையும் பதிப்பித்துள்ளார். சீர் கலை இலக்கியக் காலாண்டிதழின் ஆசிரியர் குழுவிலும் பங்குக் கொண்டுள்ளார். சன்னத்தூறல், அதகளத்தி, உடல்கள் – கால்கள் ஆகிய கவிதை நூல்கள் வெளிவந்துள்ளன.