தீக்கற்றை

அலைந்து, பரவி நிமிரும் தீயின் உக்கிரத்தில், ஒரு பெரும் வானம் சமாதானமாகிக் கொள்கின்றது – தீ.

அ

மிக நீண்ட வரிசை….
நிற்பவர்கள் மத்தியில்
ஒரு தீ விழித்துக்கொள்கிறது
வளைத்து, தள்ளிக் கொண்டு போகாத
அதன் தழலொளியில்
நிறைய அசுத்தங்கள்
வரிசைக் கட்டி நின்றன.

ஆ

ஏராளமான நிலப்படுக்கைகள்
இருள் போர்த்திக் கொண்டுள்ளன.
ஒரு தூய சாந்தம் நிலவும்
அந்த இருளை
நிமிடத்திற்கு நிமிடம்
வாயில்லாத அக்கினியொன்று
விழுங்குகின்றது.

இ

களைப்பாகயிருக்கின்றது
கபளீகரச் சந்தைப் பொருட்களைப் பார்த்து
அலுப்பாகயிருக்கின்றது
சாம்பல் நறுமணத்தை
மெதுவாக மூச்சிழுத்தேன்
தீயின் பொசுங்கலில்
ஓசையற்ற சந்தை தென்பட்டது.

ஈ

காலப்பெயர்ச்சி அனைவருக்கும்
பரிசுப் பொருட்களைத் தருவதில்லை
விடியலுக்கு முன்பே விழித்துக்கொண்டு
வெளிச்சத்தைத் தேடும் போது
வறண்ட நிலத்தின் தாகம் போல
தீ தன்னைப் பாய்ச்சுகின்றது.

உ

இருள் நன்று….
மறதியின் இருளில்தான்
ஞாபக வெளிச்சமாக
ஒரு சுடர் ஒளிர்கின்றது.

ஊ

கரடு முரடாக முறுக்கேறிக் கிடந்த சாலையில்
மந்தமான நண்பகல் மௌனமாகிக் கிடந்தது
போற போக்குல
ஒரு குரல்
அங்க தீப்பிடிச்சிருச்சாம் என்றதில்,
எங்க? எங்க?
எனக் கேட்ட நெடுஞ்சத்தத்தில்
சும்மா தான சொன்ன….
என்று
தீ கண் சிமிட்டிச் சிரித்தது.

எ

எவ்வளவு எவ்வளவு முகங்கள்
விநோதமாயிருக்கின்றன.
அதனெங்கும்
ஆக்கிரமிப்புகள்.
ஒவ்வொரு வாசலுக்குள்ளேயும் பிரவேசித்த
தீயின் உரப்பொலியில்
செஞ்சாந்து முகங்கள்.

ம. கண்ணம்மாள்

மருதநிலம் தஞ்சையைச் சொந்தமாகக் கொண்டவர். 25 ஆண்டுகள் கல்லூரியில் பேராசிரியராகப் பணி மேற்கொண்டு வருகின்றார். அதோடு, பொதுவெளியில் கவிதை, கட்டுரை, சிறுகதை என இயங்குதலோடு, சீர் வாசகர் வட்டத்தின் ஒருங்கிணைப்பாளராக உள்ளார். திருக்குறள் அக மெய்ப்பாடுகள், இலக்கண உரைகளில் சமுதாயம், முப்பெரும் கவிஞர் பாக்களில் மெய்ப்பாடுகள், பாவலரேறு ச.பாலசுந்தரம் போன்ற நூல்களையும், ‘தொல்காப்பிய மெய்ப்பாட்டியல் திருக்குறள் விளக்கம்’ என்ற நூலையும் பதிப்பித்துள்ளார். சீர் கலை இலக்கியக் காலாண்டிதழின் ஆசிரியர் குழுவிலும் பங்குக் கொண்டுள்ளார். சன்னத்தூறல், அதகளத்தி, உடல்கள் – கால்கள் ஆகிய கவிதை நூல்கள் வெளிவந்துள்ளன.